సత్ప్రవర్తనతో ఉంటే హిస్టరీ షీట్లు మూసివేత

సంగారెడ్డి ప్రతినిధి, జూలై 28 (రథసారథి న్యూస్):

జిల్లాలోని రౌడీ, కేడీ, అనుమానిత నేరస్తులు సత్ప్రవర్తనతో మెలగాలని, మంచి నడవడిక కనబరిచిన వారి హిస్టరీ షీట్లను నిబంధనల ప్రకారం మూసివేస్తామని జిల్లా అదనపు ఎస్పీ చైతన్య రెడ్డి తెలిపారు. పోలీసులతో స్నేహపూర్వకంగా వ్యవహరిస్తూ జిల్లాలో జరుగుతున్న అక్రమ కార్యకలాపాలపై సమాచారం అందించాలని ప్రజలను కోరారు. అదనపు పోలీసు అధికారి ఆదేశాల మేరకు మంగళవారం జిల్లా వ్యాప్తంగా ఉపవిభాగాల వారీగా రౌడీ మేళా కార్యక్రమాలు నిర్వహించి రౌడీ షీటర్లకు కౌన్సెలింగ్ ఇచ్చారు.

సత్ప్రవర్తనతో జీవనం సాగించాలని, నేరాలకు దూరంగా ఉండాలని సూచించారు. సంగారెడ్డి ఉపవిభాగంలో ఉప పోలీసు అధికారి సత్యయ్య గౌడ్ ఆధ్వర్యంలో పోతిరెడ్డిపల్లి చౌరస్తాలోని పీఎస్‌ఆర్ గార్డెన్‌లో కార్యక్రమం నిర్వహించి రౌడీ షీటర్లకు అవగాహన కల్పించారు. జహీరాబాద్ ఉపవిభాగంలో ఉప పోలీసు అధికారి సైదా నాయక్ ఆధ్వర్యంలో జహీరాబాద్ పట్టణం, హద్నూర్, కోహీర్ పోలీసు స్టేషన్ల పరిధిలో కౌన్సెలింగ్ నిర్వహించారు. పటాన్‌చెరు ఉపవిభాగంలో ఉప పోలీసు అధికారి ప్రభాకర్ ఆధ్వర్యంలో భానూర్ సమీపంలోని గాయత్రి ఫంక్షన్ హాల్‌లో రౌడీ మేళా నిర్వహించారు.

నారాయణఖేడ్ ఉపవిభాగంలో ఉప పోలీసు అధికారి వెంకట్ రెడ్డి ఆధ్వర్యంలో నారాయణఖేడ్ పోలీసు స్టేషన్‌లో రౌడీ షీటర్లకు కౌన్సెలింగ్ ఇచ్చారు. ఈ సందర్భంగా అదనపు పోలీసు అధికారి చైతన్య రెడ్డి మాట్లాడుతూ, చెడు నడత కలిగిన వ్యక్తులపై ప్రత్యేక నిఘా కొనసాగుతుందని, జిల్లా పోలీసు కార్యాలయం నుంచి నిరంతర పర్యవేక్షణ చేపడుతున్నామని తెలిపారు. మంచి ప్రవర్తన కనబరిచిన హిస్టరీ షీట్లను నిబంధనల మేరకు మూసివేస్తామని పేర్కొన్నారు. జిల్లాలో గంజాయి సాగు, అక్రమ రవాణా, విక్రయాలకు పాల్పడే వారిపై క్రిమినల్ కేసులు నమోదు చేసి చట్టప్రకారం కఠిన చర్యలు తీసుకుంటామని హెచ్చరించారు.

అలవాటుపడిన నేరస్తులపై నిర్బంధ చట్టం కింద చర్యలు తీసుకోవడంతో పాటు హిస్టరీ షీట్లు కూడా తెరవనున్నట్లు వెల్లడించారు. జిల్లాలో ఎక్కడైనా గంజాయి సాగు, అక్రమ రవాణా, విక్రయాలు లేదా ఇతర అక్రమ కార్యకలాపాలపై సమాచారం తెలిసిన వెంటనే ప్రజలు ఎస్-న్యాబ్ సహాయవాణి సంఖ్య 8712656777కు సమాచారం అందించి పోలీసులకు సహకరించాలని అదనపు పోలీసు అధికారి చైతన్య రెడ్డి విజ్ఞప్తి చేశారు.