సంగారెడ్డి ప్రతినిధి, సెప్టెంబర్ 10 (రథసారథి న్యూస్): వాహనాలకు సంబంధించిన అత్యవసర సమాచారం, సమాచార మార్పిడిని సులభతరం చేసే ఎన్జీఎఫ్ 132–సంపర్క్.మీ కరపత్రం, క్యూఆర్ సంకేత స్టిక్కర్ను సంగారెడ్డి డీఎస్పీ ఏ. సత్యయ్య ఆవిష్కరించారు. ఈ సందర్భంగా వాహనాలకు సంబంధించిన పలు అత్యవసర సేవలను ఒకే వేదిక ద్వారా అందించే విధానాన్ని నిర్వాహకులు వివరించారు. క్యూఆర్ స్టిక్కర్ను వినియోగించడం ద్వారా పార్కింగ్ నిషేధ హెచ్చరిక, అత్యవసర సంప్రదింపు, తాళంచెవి సంబంధిత సమాచారం, వాహనం తరలింపు హెచ్చరిక, తలుపు లేదా కిటికీ హెచ్చరిక, వాహనం ఉన్న ప్రదేశాన్ని గుర్తించడం వంటి సదుపాయాలను పొందవచ్చని తెలిపారు.
అంతేకాకుండా వాహన యజమాని మొబైల్ నంబర్ గోప్యతకు కూడా రక్షణ కల్పించవచ్చని పేర్కొన్నారు. కార్లు, ద్విచక్ర వాహనాలు, స్కూటర్లు, ఆటోలు, వాణిజ్య వాహనాలకు ఈ క్యూఆర్ సంకేత స్టిక్కర్ ఉపయోగపడుతుందని తెలిపారు. ఎన్జీఎఫ్ 132–సంపర్క్.మీ సేవలను ప్రజల్లోకి విస్తృతంగా తీసుకెళ్లడం ద్వారా రహదారి భద్రత, అత్యవసర సమాచార మార్పిడిపై ప్రజల్లో అవగాహన పెంపొందించవచ్చని తెలంగాణ, ఆంధ్రప్రదేశ్ రాష్ట్ర పంపిణీదారుల ప్రతినిధులు తెలిపారు.
