నిద్రమత్తులో తూనికలు–కొలతల శాఖ-తెలంగాణలో రేషన్‌ బియ్యం తూకాల్లో భారీ తేడాలు!

-క్వింటాళ్ల కొద్దీ బియ్యం పక్కదారి పడుతోందని గ్రామస్తుల ఆరోపణలు

-ఏళ్లుగా రేషన్‌ కాంటాలను పరిశీలించడంలేదని విమర్శలు

-తనిఖీలు లేక అక్రమాలకు అడ్డూ అదుపూ లేదంటున్న లబ్ధిదారులు

రాథసారథి ప్రత్యేక కథనం:

తెలంగాణలో తూనికలు–కొలతల శాఖ పనితీరుపై విమర్శలు వెల్లువెత్తుతున్నాయి. ప్రజలకు న్యాయమైన తూకం, కొలతలు అందేలా పర్యవేక్షించాల్సిన అధికారులు క్షేత్రస్థాయిలో తగినంతగా తనిఖీలు నిర్వహించడం లేదనే ఆరోపణలు వినిపిస్తున్నాయి. ముఖ్యంగా గ్రామీణ ప్రాంతాల్లో రేషన్‌ బియ్యం పంపిణీ సమయంలో తూకాల్లో తేడాలు చోటుచేసుకుంటున్నాయనే ఫిర్యాదులు పెరుగుతున్నాయి.

-రేషన్‌ బియ్యంలో తూకాల గోల్‌మాల్‌?
రాష్ట్రంలోని పలు గ్రామాల్లో రేషన్‌ దుకాణాల వద్ద లబ్ధిదారులకు అందించే బియ్యం తూకంపై అనుమానాలు వ్యక్తమవుతున్నాయి. ప్రభుత్వం నిర్ణయించిన పరిమాణం మేరకు బియ్యం అందుతున్నదా? తూకం యంత్రాలు సక్రమంగా పనిచేస్తున్నాయా? వాటిని అధికారులు క్రమం తప్పకుండా తనిఖీ చేస్తున్నారా? అనే ప్రశ్నలు తలెత్తుతున్నాయి. తూకాల్లో స్వల్ప తేడా కనిపించినా పెద్ద సంఖ్యలో రేషన్‌ లబ్ధిదారులకు నష్టం కలిగే అవకాశం ఉందని ప్రజలు ఆందోళన వ్యక్తం చేస్తున్నారు. ముఖ్యంగా గ్రామీణ ప్రాంతాల్లో అధికారులు ఆకస్మిక తనిఖీలు నిర్వహించి వాస్తవ పరిస్థితులను పరిశీలించాలని కోరుతున్నారు.

-రేషన్‌ దుకాణాలపై నిఘా ఎక్కడ?
రేషన్‌ దుకాణాల్లో ఉపయోగిస్తున్న తూనిక యంత్రాల ఖచ్చితత్వాన్ని సంబంధిత అధికారులు నిరంతరం పరిశీలించాల్సి ఉంది. తూకాల్లో తేడాలు ఉన్నట్లు ఫిర్యాదులు వస్తే వెంటనే తనిఖీలు నిర్వహించి, తప్పిదాలు నిర్ధారణ అయితే నిబంధనల ప్రకారం చర్యలు తీసుకోవాల్సిన అవసరం ఉంది. అయితే క్షేత్రస్థాయిలో పర్యవేక్షణ కొరవడటంతోనే ఇలాంటి ఆరోపణలకు అవకాశం ఏర్పడుతోందని పలువురు అభిప్రాయపడుతున్నారు.

-అధికారులు మేల్కొనేది ఎప్పుడు?
తెలంగాణలోని అన్ని జిల్లాల్లో రేషన్‌ దుకాణాలపై ప్రత్యేక తనిఖీలు నిర్వహించి, తూకం యంత్రాల పనితీరు, ధృవీకరణ, బియ్యం పంపిణీ విధానాన్ని పరిశీలించాలని ప్రజలు కోరుతున్నారు. లబ్ధిదారుల నుంచి వచ్చే ఫిర్యాదులను సైతం అధికారులు తీవ్రంగా పరిగణించి తక్షణ చర్యలు తీసుకోవాలని డిమాండ్‌ చేస్తున్నారు. పేదల రేషన్‌లో ఒక్క కిలో బియ్యం కూడా తగ్గకుండా చూడాల్సిన బాధ్యత అధికారులదే. రేషన్‌ బియ్యం తూకాల్లో వస్తున్న ఫిర్యాదులపై తెలంగాణ ప్రభుత్వం, జిల్లా యంత్రాంగం, తూనికలు–కొలతల శాఖ ఉన్నతాధికారులు ఎలాంటి చర్యలు తీసుకుంటారో వేచి చూడాలి.

-చీక్‌ మద్దూరులో రేషన్‌ డీలర్‌పై గ్రామస్తుల ఫిర్యాదు
సంగారెడ్డి జిల్లా హత్నూర మండలం చీక్‌ మద్దూరు గ్రామంలోని రేషన్‌ దుకాణం నంబరు 3705008లో లబ్ధిదారులకు పంపిణీ చేస్తున్న బియ్యం తూకంలో అక్రమాలు జరుగుతున్నాయని గ్రామస్తులు ఆరోపించారు. రేషన్‌ బియ్యం తీసుకుంటున్న సమయంలో డీలర్‌ నిర్ణీత పరిమాణం కంటే సుమారు రెండున్నర నుంచి మూడు కిలోల వరకు తక్కువగా తూకం వేస్తున్నారని వారు పేర్కొన్నారు. సోమవారం గ్రామస్తులు అనుమానంతో మరో తూకం యంత్రంపై బియ్యాన్ని తూకం వేయగా, సుమారు రెండున్నర కిలోల తేడా ఉన్నట్లు గుర్తించినట్లు తెలిపారు.

చీక్‌ మద్దూరు గ్రామానికి నెలకు సుమారు 80 క్వింటాళ్ల బియ్యం కేటాయింపు ఉంటుందని గ్రామస్తులు తెలిపారు. 50 కిలోల బియ్యం తూకంలో రెండున్నర నుంచి మూడు కిలోల వరకు తక్కువగా వస్తే, మొత్తం పంపిణీలో గణనీయమైన తేడా ఏర్పడే అవకాశం ఉందని వారు పేర్కొన్నారు. తమ అంచనాల ప్రకారం నెలకు సుమారు నాలుగు క్వింటాళ్ల వరకు బియ్యం లబ్ధిదారులకు చేరకుండా పోయే అవకాశం ఉందని ఆరోపించారు. అయితే ఈ లెక్కలు, ఆరోపణల వాస్తవాలను సంబంధిత అధికారులు సమగ్రంగా తనిఖీ చేసి నిర్ధారించాల్సి ఉంది. ఇలాంటి తూకం తేడాలను గతంలోనూ గుర్తించామని, పలుమార్లు డీలర్‌ దృష్టికి తీసుకెళ్లినా సరైన స్పందన లభించలేదని గ్రామస్తులు వాపోయారు.

తెలంగాణ ప్రభుత్వం పేద ప్రజలకు ఉచితంగా బియ్యం పంపిణీ చేస్తున్న సమయంలో తూకంలో కోత విధించడం వల్ల అర్హులైన లబ్ధిదారులు తమకు రావాల్సిన బియ్యంలో కొంత భాగాన్ని కోల్పోతున్నారని వారు ఆవేదన వ్యక్తం చేశారు. ఈ వ్యవహారంపై సంబంధిత అధికారులు సమగ్ర విచారణ చేపట్టి, ఎన్ని రోజులుగా తూకంలో తేడాలు చోటుచేసుకుంటున్నాయో నిర్ధారించాలని గ్రామస్తులు కోరారు. రేషన్‌ దుకాణాన్ని తనిఖీ చేసి బియ్యం తూకం, నిల్వలు, పంపిణీ వివరాలను పరిశీలించాలని పౌరసరఫరాల శాఖ అధికారులు, తూనికలు–కొలతల శాఖ అధికారులు స్పందించి బాధ్యులపై తగిన చర్యలు తీసుకోవాలని గ్రామ ప్రజలు విజ్ఞప్తి చేశారు.