క్షయ వ్యాధిగ్రస్తులకు ఉచిత పోషకాహార కిట్లు

సంగారెడ్డి ప్రతినిధి, సెప్టెంబర్‌ 17 (రథసారథి న్యూస్): క్షయ వ్యాధిగ్రస్తులకు పోషకాహారం అందించేందుకు యూనియన్‌ బ్యాంక్‌ సామాజిక సేవా సంస్థ సామాజిక బాధ్యత నిధులతో చేపట్టిన ఉచిత పోషకాహార కిట్ల పంపిణీ కార్యక్రమాన్ని రాష్ట్ర వైద్య, ఆరోగ్య శాఖ మంత్రి సి. దామోదర రాజనర్సింహ ప్రారంభించారు. సంగారెడ్డి జిల్లాలో గురువారం నిర్వహించిన కార్యక్రమంలో మంత్రి జ్యోతి ప్రజ్వలన చేసి కార్యక్రమాన్ని ప్రారంభించడంతో పాటు క్షయ వ్యాధిగ్రస్తులకు స్వయంగా పోషకాహార కిట్లను అందజేశారు.

క్షయ వ్యాధిగ్రస్తుల పోషకాహారం కోసం ప్రభుత్వం ఇప్పటికే నెలకు రూ.1,000 చొప్పున ఆర్థిక సహాయం అందిస్తోందని అధికారులు తెలిపారు. దీనికి అదనంగా సేవా సంస్థలు, పారిశ్రామిక సంస్థలు తమ వంతు సహకారంగా ఉచిత పోషకాహార కిట్లను అందిస్తున్నాయని పేర్కొన్నారు. ఇందులో భాగంగా యూనియన్‌ బ్యాంక్‌ సామాజిక సేవా సంస్థ తమ సామాజిక బాధ్యత నిధుల నుంచి రూ.25 లక్షల విలువైన పోషకాహార కిట్లను రాష్ట్రవ్యాప్తంగా 700 మంది క్షయ వ్యాధిగ్రస్తులకు నెలకు ఒక కిట్‌ చొప్పున ఆరు నెలల పాటు అందించేందుకు కార్యక్రమాన్ని చేపట్టింది.

సంగారెడ్డి జిల్లాలో 2026లో ఆగస్టు 31 నాటికి 1,527 క్షయ వ్యాధి కేసులు నమోదైనట్లు అధికారులు వెల్లడించారు. జిల్లాలో 300 మంది క్షయ వ్యాధిగ్రస్తులను గుర్తించి వారికి ఈ పోషకాహార కిట్లను అందించేందుకు చర్యలు చేపట్టారు. ఈ సందర్భంగా మంత్రి దామోదర రాజనర్సింహ మాట్లాడుతూ క్షయ రహిత సమాజ నిర్మాణానికి ప్రభుత్వం చేస్తున్న కృషికి తోడుగా పారిశ్రామిక, సేవా సంస్థలు ముందుకు వచ్చి బాధితులకు అవసరమైన పోషకాహారాన్ని అందించడం అభినందనీయమన్నారు.

క్షయ వ్యాధి నిర్మూలనకు ప్రభుత్వంతో పాటు ప్రజలు, స్వచ్ఛంద సంస్థలు, పారిశ్రామిక సంస్థలు భాగస్వాములు కావాలని సూచించారు. కార్యక్రమంలో తెలంగాణ పారిశ్రామిక మౌలిక సదుపాయాల సంస్థ చైర్‌పర్సన్‌ టి. నిర్మల జగ్గారెడ్డి, సంగారెడ్డి జిల్లా కలెక్టర్‌ ప్రతీక్‌ జైన్‌, యూనియన్‌ బ్యాంక్‌ రాష్ట్ర నిర్వాహకుడు వి. రాధాకృష్ణన్‌ పాల్గొన్నారు. రాష్ట్ర సంయుక్త సంచాలకుడు (క్షయ) డాక్టర్‌ రాజేషం, జిల్లా వైద్య ఆరోగ్య శాఖ అధికారి డాక్టర్‌ కె. లలితాదేవి, వైద్య విద్య సంచాలకురాలు డాక్టర్‌ ఎన్‌. వాణి, ప్రభుత్వ వైద్య కళాశాల ప్రిన్సిపాల్‌ డాక్టర్‌ జి. ప్రకాశ్‌రావు, క్షయ నిర్మూలన కార్యక్రమ అధికారి డాక్టర్‌ సి.హెచ్‌. అరుణకుమారి, వైద్య కళాశాల విద్యార్థులు, జాతీయ క్షయ నిర్మూలన కార్యక్రమ సిబ్బంది, జిల్లా వైద్య ఆరోగ్య శాఖ కార్యాలయ సిబ్బంది పాల్గొన్నారు.