సంగారెడ్డి ప్రతినిధి, ఆగస్టు 7 (రథసారథి న్యూస్):
వర్షాలు తక్కువగా కురుస్తున్న నేపథ్యంలో అందుబాటులో ఉన్న నీటిని సమర్థవంతంగా వినియోగించుకునేలా రైతులు పంట కుంటలను నిర్మించుకునేలా, ఆరుతడి పంటలను సాగు చేసుకునేలా వ్యవసాయ శాఖ అధికారులు ప్రోత్సహించాలని జిల్లా కలెక్టర్ ప్రతీక్ జైన్ అన్నారు.
వానాకాలం పంటల సాగు, స్మార్ట్ రేషన్ కార్డులు, కొత్త పెన్షన్లు తదితర అంశాలపై శుక్రవారం హైదరాబాద్ నుంచి రాష్ట్ర మంత్రులు తుమ్మల నాగేశ్వరరావు, ఉత్తమ్ కుమార్ రెడ్డి, జూపల్లి కృష్ణారావు, ప్రభుత్వ ప్రధాన కార్యదర్శి సంజయ్ జాజు సంబంధిత ఉన్నతాధికారులతో కలిసి అన్ని జిల్లాల కలెక్టర్లతో వీడియో కాన్ఫరెన్స్ నిర్వహించి సమీక్షించారు.
ఈ సందర్భంగా రాష్ట్రంలోని పలు ప్రాజెక్టులకు ప్రస్తుతం వరద నీరు వస్తున్నప్పటికీ, ఆయా రిజర్వాయర్లలో నీటి లభ్యతను ఆధారంగా చేసుకుని రైతులు ఏ పంటలు సాగు చేయాలనే దానిపై స్పష్టత ఇవ్వాల్సిన అవసరం ఉందని సూచించారు. కాలువల కింద రైతులు వరి సాగు చేస్తే, వరద నీరు తగ్గిన అనంతరం పంటలు చేతికి వచ్చే వరకు సాగునీటి విడుదలలో ఇబ్బందులు తలెత్తే అవకాశం ఉందన్నారు. దీనిని దృష్టిలో ఉంచుకుని ఈ నెల 8న ఇరిగేషన్ అడ్వైజరీ బోర్డుల సమావేశాలు నిర్వహించి తగిన నిర్ణయాలు తీసుకోవాలని సూచించారు. భూగర్భ జలాల పరిస్థితి, విద్యుత్ సరఫరా వంటి అంశాలపై అంచనాలు రూపొందించుకుని స్థానిక ప్రజాప్రతినిధులు, అధికారులు సమన్వయంతో సమావేశాలు నిర్వహించి ముందుకు సాగాలని తెలిపారు.
వచ్చే వేసవి వరకు తాగునీటి అవసరాలను దృష్టిలో ఉంచుకుని, ఎల్నినో ప్రభావంతో వర్షాలు తక్కువగా కురిసే అవకాశం ఉన్న నేపథ్యంలో రైతులు ఆరుతడి పంటలు సాగు చేసేలా వ్యవసాయ శాఖ అధికారులు అవగాహన కల్పించి ప్రోత్సహించాలని సూచించారు. వన మహోత్సవంలో భాగంగా నిర్దేశించిన లక్ష్యాలకు అనుగుణంగా మొక్కలు నాటి, వాటి సంరక్షణకు చర్యలు తీసుకోవాలని ఆదేశించారు. ఆగస్టు 15 నుంచి స్మార్ట్ రేషన్ కార్డుల పంపిణీకి అవసరమైన ఏర్పాట్లు పూర్తి చేయాలని సూచించారు. అర్హులైన వారందరికీ కొత్తగా పెన్షన్లు అందించేందుకు అవసరమైన ఏర్పాట్లు చేయాలని అధికారులను ఆదేశించారు. సంగారెడ్డి వీడియో కాన్ఫరెన్స్ హాల్ నుంచి చార్మినార్ సర్కిల్ చీఫ్ కన్జర్వేటర్ ఆఫ్ ఫారెస్ట్స్ డాక్టర్ ప్రియాంక వర్గీస్తో కలిసి వీడియో కాన్ఫరెన్స్లో పాల్గొన్న జిల్లా కలెక్టర్ ప్రతీక్ జైన్ మాట్లాడుతూ, జిల్లాలో ఇటీవల కురిసిన వర్షాలతో పలు మైనర్ ఇరిగేషన్ (ఎంఐ) ట్యాంకులు నిండాయని తెలిపారు. జిల్లాలో రైతులు ప్రధానంగా పత్తి, సోయాబీన్, కంది పంటలను సాగు చేస్తున్నారని పేర్కొన్నారు.
రైతులను పంటల వైవిధ్యీకరణ వైపు ప్రోత్సహిస్తున్నామని, ఆరుతడి పంటల సాగు చేపట్టేలా అవగాహన కల్పిస్తున్నామని తెలిపారు. జిల్లాలో తాగునీటికి ఎలాంటి ఇబ్బందులు తలెత్తకుండా ముందస్తు ప్రణాళికతో చర్యలు చేపడుతున్నామని వివరించారు. వీడియో కాన్ఫరెన్స్ అనంతరం జిల్లా అధికారులతో కలెక్టర్ సమీక్షించి, ఆయా శాఖల పరిధిలో చేపట్టాల్సిన చర్యలపై పలు సూచనలు చేశారు. ఈ వీడియో కాన్ఫరెన్స్లో జిల్లాకు చెందిన వివిధ శాఖల జిల్లా అధికారులు పాల్గొన్నారు.
